《追风者》里个上海话_新浪财经

◆秦来来

前段辰光，电视剧《追风者》热播，勿少人天天追剧。搿部电视剧讲述了20世纪30年代，正直青年魏若来目睹社会黑暗，在哥哥魏若川以及徐诺、沈近真等共产党人个言传身教下，找到人生方向，投身革命道路个过程。

电视剧个背景是上海，魏若来居住个七宝街，人群轧进轧出，黄包车穿来穿去，路边摆仔勿少小摊，像馄饨摊、皮匠摊咾啥，烟火气满满。

里向勿少角色讲一口“沪普”，尤其是杨昆出演个周姨，讲起上海话来交关流利。勿过么，其中虞世清讲个一口上海闲话就比较尴尬了。搿搭提出几点，探讨一番。

第九集里向，虞世清对张鸣泉讲：“下棋，讲究的是有来有往。”上海话当中，讲“着（扎）棋”，勿讲“下棋”。虞世清为了拉沈图南入套，开出条件：“新亚百货缺一名‘主事’，侬要是不嫌弃的话，我愿意把新亚股份全部转拨侬。”其中“嫌弃”讲成“野气”，“股份”讲成“古分”。

第十集里向，虞世清对张鸣泉讲：“纵观历史，这种酷吏（指沈图南）都没有好下场。”其中“酷吏”讲成“苦力”。虞世清指使张鸣泉派人在路上暗杀沈图南，以致沈图南没能勒规定辰光赶到央行签约，虞世清阴阳怪气地讲：“沈顾问没有到，一定是碰到什么棘手的事，大家不要苛责。”其中“棘手”讲成“集手”，“苛责”讲成“枯石”。

更加好白相个是，当淞沪警备司令部侦缉处处长康少捷暗中拜托虞世清“通路子”，找“财政部高官夫人”做后台，虞世清居然对伊讲：“‘大姐’已经答应了，侬好放心了。”其实当年对于迭种高官太太，一般称“夫人”，像虞世清迭能“称姐道弟”属于尊卑不分，而且老底子（一直到20世纪50年代）上海人一般叫家里的“娘姨”“佣人”为“大姐”。例句：侬讲个是伊啊，伊么是勒了张家做“大姐”个呀。假使虞世清当年真个拿财政部高官“孔某人”个夫人叫“大姐”，弄勿好伊只“骷郎头”也要搬个地方了！