姆妈心爱个宝贝_新浪财经

文/周爱民

姆妈今年100岁了。伊有一台“上岗”62年个“三五”牌台钟，到现在还走得斜气准。

20世纪60年代初，阿拉屋里一共11口人，侪靠阿爸工资生活。姆妈精打细算做计划：油盐酱醋、日用品、需要更新个衣裳、读书小囡个书费杂费……一条条记勒簿子浪，至于阿拉搿点日长夜大个小囡身浪个衣裳，侪靠姆妈个巧手，修修改改，缝缝补补。有辰光半夜三更醒转来，会看到姆妈勒灯下头缝补衣裳。常常听邻居讲：周家姆妈手巧又会当家，老来三嗰。

1962年，姆妈荣获上海市“好当家”，伊个故事登上了解放日报。后来，经常有人来屋里参观，阿爷讲，外头来人多，面子还要讲嗰，去买只“三五”牌台钟，卖相好又实用，铜钿我来出。记忆里，当年邻居屋里一般只有一只小闹钟。

台钟买回来，放勒五斗橱浪，暖色个木质外壳、银白色钟盘、咖啡色指针，还有一扇可开关个玻璃罩门，看上去弹眼落睛，成勒姆妈个“宝贝”。为台钟上发条成了爷娘个“特权”，从来勿让阿拉搭手，嫌阿拉毛手毛脚。二阿姐特地裁了一块米色绣花方巾，盖勒钟浪。

屋里打扫卫生，揩台子个辰光，姆妈总要提醒一句：“当心一点，覅弄坏台钟个玻璃门。”有一天早浪，我看到台钟慢了2分钟，就想扳开钟盖拨指针。姆妈赶过来制止，还骂：“小鬼头，侬想闯祸啊！”每天清早5点钟，台钟会敲响，姆妈就会轻手轻脚起床，戳开煤球炉子烧开水、做早饭。

时光匆匆，六十二年过去了，姆妈还是喜欢听台钟个钟声，当然，上发条之类个事体老早就交拨阿拉了。伊搿件宝贝除脱换过发条，从来呒没“罢工”过，陪阿拉留下了交关难忘个记忆。